Útskrifuð sem fjölmiðlafræðingur

Þann 10.maí útskrifaðist ég með B.A. gráðu í fjölmiðlafræði frá Webster University í Vín. Dagurinn byrjaði um 9 leytið þegar við fórum í Konzerthaus í myndatökur og á æfingu. Svo var klukkustunda bið sem ég notfærði til að stelast á mcdonalds. Svo var stóra stundin runnin upp. Þar sem þetta er amerískur skóli vorum við klædd í amerísku útskriftarfötunum og gengum inn við ameríska útskriftarsönginn, mér leið eins og í bíómyndunum. Ég var í fyrstu röð þar sem ég fór upp í púlt til að veita verðlaun fyrir kennara ársins, ég hélt því ræðu um Anthony Löwstedt og gekk mjög vel.



Næst voru haldnar ræður og veitt verðlaun. Gaman að margir kunningjar mínir fengu verðlaun og voru beðnir að standa upp. Ég fékk einnig að standa upp þegar minnst var á Community Service Awards. Svo voru bachelor beðnir að standa upp og koma þegar kallað var á nafnið þeirra, einn í einu var kallaður upp, tók í hönd skólastjórans, diploma í hinni hendi (sem var nú ekki alvöru diploma heldur frá alumni félaginu)og brosti til myndatökumannsins og gekk svo af sviðinu. Gaman að sjá fjölskylduna með íslenska fánann. Fleiri ræður og svo labbað út.

Við eyddum tímanum eftir athöfnina að kveðja fólk og héldum svo í næsta garð, Stadtpark til að taka myndir af mér bachelor, Ásdísi master og pabba doktor, og fögnuðum svo á uppáhalds kaffihúsið okkar Cafe Central. Loks var haldið heim á hótel til að hvíla sig fyrir kvöldið.